gulzar aur mai..

posted on : 25 January 2008

Geela mann shayad bistar ke paas padha hai..

Aadhe gile aadhe sukhe...

--------------------------------------

Raat ko andhere ke shor mein

Mai jab gungunati hun

Hawa ka har kona chorus mein gaata hai

Aur mere tute hue sur

ek bandish ban jaate hain..

khuda kaun, to pata nahi

par woh chup chap sunta rahta hai

shayad kisi sur mein taan bhi mila deta hoga

isilye raat ke geet kuchh paak sunai dete hain..

mai har din iss raat ka intezaar karti hun

nashe mein hone ka gumaaan rakhti hun

koi yeh na soche maine nasha shuru kar diya

bas zindagi ke nashe mein jeeti hun..

din se raat, raat se din

ka safar bhi

mujhe heraan karta hai..

ghadi ki har tik tik mein

zindagi ka safar dikhai deta hai..

gar jo yeh ghadi ruk jaye

mai sanson se unhe badha dungi,

har lamha isme mera hai

kuchh lamhe unme badha lungi..